Gen 39 | ATA | STEP | Ioxe, Iosepu e ta Isimaeli mino'u mulai ne Aixiputo ne, mino'u mulai noxou Potipaa sou mulotonu. Potipaa ne, anu itema tila vile. Anu itema sou xaixai noxou tatananu tuala ne Aixiputo. Anu tila noxi'a ane'i ane sou isaxila'u taasou tatananu tuala ne Aixiputo.

a 39:2Apo 7:9

Genesis 39

Iosepu Ilee Potipaa Semau

1 Ioxe, Iosepu e ta Isimaeli mino'u mulai ne Aixiputo ne, mino'u mulai noxou Potipaa sou mulotonu. Potipaa ne, anu itema tila vile. Anu itema sou xaixai noxou tatananu tuala ne Aixiputo. Anu tila noxi'a ane'i ane sou isaxila'u taasou tatananu tuala ne Aixiputo.

2 ^aIAUE uxoo noxou Iosepu, la sou mii ma'ia ane anu u'oxonu ne, uxali laixe misevile. Io, anu Iosepu mulai muxolu noxou Potipaa. 3 Anu uxoxoolu noxou tilasou Potipaa ne la, tilasou mutongonu lexe IAUE a uxoo noxou mole ane xaixai piepiena ne anu mu'oxonu laixe mukalusi. 4 Potipaa opoonu usexelaxu Iosepu misevile la sou molu musosovosou lexe anu uxali loxo itema vile sou uxoo 'alai noxou. La sou mumuxaxu sou usaxila'u taasou mo mixumixu mo miumiu no nano no taasou ne ukalusi. 5 Tava'u xo Iosepu ane Potipaa muno'u sou mune'e sou usaxisaxila'u mixumixu ilou miumiu, la sou ane IAUE mualusou tila noxou mo ane'i ane ilo'a ixoxoo no tani noxou ne mo miumiu ilou mixumixu no taasou mo no xaixu kalumo. 6 La sou Potipaa mu'italonu mimii tavu'alo ne no avolu Iosepu sou anu molu usaxila'u ukalusi. Ia anu uxavutalanu mii vile la uasi. Anu uxavutalasou la'ilalisi.

Iosepu ne muleme maulu vile xaviinu misevile. Mo iou ne lailaixe misevile. 7 La sou maxuvee uasi manina, Potipaa semau miisuxu xe miavuti la ixoloxixiiou. La sou mivikalanu lexe, “Nane'e mo nengei talai taai no luu noxilo.”

8 Ia Iosepu mulomu ua la muvikalane lexe, “Tila noxilo musosovosilo mo mumuxaxo lexe eni sou asaxisaxila'u mimii no nano no tani 'o ukalusi. Miumiu mo mixumixu tavu'alo ne anu mumuxaxo lexe enisi melo asaxila'u. 9 Tani 'o mo, mimii no nano 'o ne muxolu no anu saxisaxila'u noxilosi aloxo anu, ia mii vile no nano 'o anu uvikalalelixu lexe eni amomomo sou asaxila'u uasi, uasi. Ia nini ne, anu uvikalalelisine uasi, xo anu semau ane nini. Anu umomomo sou eni amulinu masaxa noxine uasi. Xo maasi xe eni amuli masaxa noxine, la loxo eni a'oxo 'ilixo masua manina no iou Lataua.” 10 Ia ane ilomu uasi manina. No voxovoxo utotomu ne, ane ilai noxou sou ixoloxixiioi sou lexe anu ulai noxie, ia anu ne xaviinu misevile la ulomuxe uasi manina, mo anu muxolu va'axu noxie.

11 Io, no voxo vile la anu Iosepu mulai no nano no taasou tila noxou mo a u'oxo'oxonu xaixai noxou se'i. Ta mitema sou xaixai noxou tila noxou vile noxi'a ne uxolu no nano uasi. 12 Xe aliku 'o miavuti xe mine'e la miteteli pekia'u vaxa no anu tokolomou veveeni e utataanu ka mivikalanu lexe, “Nane'e mo nengei talai taai.” Xe anu muavuti la mulo'ene sou mu'ume mulai no ale. Miisou e mutataanu ne, muluvu no vasimolu mole ane mitetelisou no avole ne.

13 Xe ane mimalei loxo 'o la anu ane u'ume ulai no ale, ia tokolomou ane ane itetelisou 'o xe, 14 miavuti la mi'ava mulai noxi'a ta mitema sou xaixai noxie lexe, “Ngamaisou mii 'o! Itemasie Evalaio e muluxeni muno'u sou mune'enu muxolu no tani noxixe 'o, utoxonenge uasi. Mulutusi ka mune'e no ano no taasilo e aai no anu sou uexe utetelisilo mo ulai noxilo no anu masaxa noxousi. 15 Ia eni eunga toxoxa'a sila anu muiave mulai no ale io mutautalonu tokolomou e mutaanu muai no pa'umelo.”

16 Ane mimuxaxu muai ne xe mulue muxali, 17 la sou ane mia'alou, “Itemasie Evalaio e neno'u mune'e muxolu 'o sou napalupalusou, utoxole uasi manina, mune'e mu'una no taasilo e aai no anu sou lexe ulai noxilo, sila ua. 18 Eni eungaunga sila anu mu'ume muiave mulai no ale ia mutautalonu tokolomo e mutataa no vasimolu no pa'umelo.”

19 Xe Potipaa mulomu aloxo ne, la la'iaxu misevile. Tanu no nano ne navu ukaakaa. 20 La sou muvikalane'i ta mitema sou 'oto'oto noxou tatananu tuala sou mine'e mitetelisou Iosepu sou milailixu no taasou navunavu noxou tatananu tuala sou uno'u navunavu sou 'ilixo ane anu mu'oxonu ne. Mulai muxolu no taasou navunavu ne 21 ^bia IAUE muxolu noxou mo mualusou mole mimii e anu u'oxo'oxonu no nano ne u'oxonu laixe ukalusi. La sou itema sou usaxila'u tani ane ne, opoonu usexelaxu Iosepu misevile. 22 Itema ane ne muavuti la mumuxaxu Iosepu sou usaxila'a ta menexu e ilo'a ixoxoo no nano no taasou navunavu ne mo xaixai piepiena no nano ne anu molu usaxila'u ukalusi. 23 Mole anu itema ne, umomomo sou usaxila'u xaixai vile la uasi xo xaixai tavu'alo ne uxoo no avolu Iosepusi. Anu molusi u'oxo mimii ne la laixe ukalusi xo IAUE muxoo noxou.